Eu quixera ao Dépor en Primeira e un goberno da Marea Atlántica, pero se teño que elixir, o do Dépor se soluciona o ano que vén ;-)

Nós xa vimos con moita forza, e non teño dúbidas de que somos a alternativa ao PP de Negreira. Despois do acto de onte, multitudinario e moi emocionante, volveremos ao que levamos meses facendo, patear as rúas, falar con todos os veciños e veciñas e facer actos ilusionantes e imaxinativos. Confiamos en que sigamos facendo medrar a Marea por toda A Coruña. En canto a Beiras, dependerá da súa axenda, nós encantados se pode facernos un oco.

Non queremos fixarnos un número concreto. Queremos ter os suficientes para gobernar. Cremos que podemos ter algún máis dos que nos están dando as enquisas.

Creo que están na cabeza de todos. Cando falamos do 1% falamos de Méndez, por exemplo, que durante anos manexou unha institución que era de todos como a Caixa Galicia, como se fose súa, cos resultados que xa coñecemos.

Pablo non dixo tal cousa. Podemos apoia a Marea Atlántica como o fan EU, Anova, Compromiso por Galicia, Equo ou Espazo Ecosocialista, e nestas eleccións municipais, quen quera votar a estas formacións sabe que a súa opción é a Marea Atlántica. A Marea é un instrumento de unidade e de confluencia, por iso participo nela. Esta é a miña aposta e non afiliarme a ningún partido concreto.

Xa dixemos por activa e por pasiva que os pactos van depender de políticas, códigos éticos, principios, valores, programa e metodoloxías participativas, non de siglas ou etiquetas. A partir do 24 de maio na Coruña vai haber dúas opcións, a que representa o PP, coas súas políticas antisociais, de precariedade, de tristeza e a ilusión que representa a Marea Atlántica, con políticas centradas na xente e coas prioridades claras. Os demais terán que elexir en cal destes bandos se colocan.

Xa contestei un pouco máis arriba. Non nos planteamos un número concreto. Creo que vamos sacar algún máis dos que actualmente nos dan as enquisas e, en todo caso, contamos con alcanzar unha maioría suficiente para gobernar.

Eu son veciño da Gaiteira, así que si, algo sei do que me conta. Se gobernamos vamos ser moi estritos co cumprimento das condicións dos contratos e auditaremos os que están en marcha, para que non se produzan situacións como a que relata. Neste caso concreto, efectivamente haberá que buscar unha solución e estudar se se pode repercutir na empresa contratante.

Non, claro que non. A número dous saíu dun proceso de primarias, como os demais candidatos e candidatas. Simplemente se aplicou a corrección de xénero prevista para que a lista fora paritaria, e o número dous foi o posto que lle correspondeu a Rocío Fraga seguindo esas regras, e o que ela merece.

Cando falamos de cidade libre de desafiuzamentos estamos falando principalmente dos que son responsabilidade do goberno local (caso de Elviña) e dos impagos de hipotecas. No caso que vostede sinala, o Concello atenderá ás persoas que se quedan sen vivenda, pero non a costa dos propietarios particulares, claro.

Nun hipotético pacto con calquera hai unha serie de medidas que son irrenunciábeis para nós, como son o listado de 25 medidas urxentes, e as relativas ao código ético, metodoloxía de goberno participativa, transparencia, e prioridades. Isto é irrenunciábel. Vexo que moitas propostas da Marea tamén aparecen despois noutros programas, así que creo que non haberá problemas...

Tampouco prometimos tantas axudas, en realidade. Só a Renda Social Municipal e certas bonificacións tributarias. A única subida que temos prevista é a do IBI para as vivendas baleiras en propiedade dos Bancos e do Banco Malo, polo que para os veciños e veciñas da Coruña non haberá ningunha subida de impostos, senón ao revés, baixaremos as taxas da auga, por exemplo, que actualmente son maiores que o custe do servizo e serven para pagar os salarios millonarios de EMALCSA (o seu director cobra máis que o alcalde, arredor de 100.000 euros ao ano) ou para proxectos de dubidosa utilidade social como o Coruña Futura. Non fai falla subir impostos, só cambiar as prioridades e dedicar o diñeiro (o Concello da Coruña ten un presuposto de 250 millóns de euros) ao que realmente é necesario.

Nós non somos unha coalición, polo que non temos os problemas de funcionamento propios desta. Na Marea participan persoas e non partidos, polo que as regras de xogo están claras e non dependen da forza das siglas, senón da vontade das persoas. Esa é a gran diferencia. Aprendemos do pasado, así podemos corrixir o que a outros non lle foi ben.

Vamos auditar o seu funcionamento e vixiar o cumprimento das contratas. Pouco a pouco tentaremos rescatar os servizos privatizados, que normalmente son focos de corrupción (véxase Vendex) e de dubidosa xestión. Pero sen medidas efectistas, e con sentidiño, sen comprometer as arcas públicas só para ganar titulares.

O extremismo leva anos gobernándonos e, en efecto, non foron capaces de facer nada ben. Agora vimos a xente normal, que seguro que o facemos moito mellor.

Por suposto. Será do primeiro que fagamos. Non só os códigos éticos, que nos parecen fundamentais, senón tamén medidas de transparencia. Se a axenda de alcalde e concelleiros é pública, se todas as decisións que se toman están a disposición da prensa e da cidadanía e se calquera pode consultar todos os contratos que se asinan no Concello, os gobernantes estarían vixiados e a corrupción e a opacidade non serían posíbeis.

Isto xa o fixemos público. Nós desafectaríamos a marxe dereita da Avenida da Vedra, é dicir Elviña. Paralizariamos os desafiuzamentos, e reordenariamos o resto. Isto falámolo xa cos veciños e veciñas de Elviña e cos cooperativistas do ofimático. E, no básico, todos están de acordo.

O que dixen antes. Transparencia máxima na xestión municipal, para que os veciños e veciñas poñan unha lupa sobre o goberno e nos controlen. Tolerancia cero cos líos xudiciais. Calquera imputado xudicial debería deixar o seu cargo. E aplicación estrita do Código Ético da Marea.

Baixarme o salario. Actualmente o Alcalde da Coruña cobra máis de 65.000 euros brutos ao ano. Eu ganaría 40.000 como máximo. E non só iso, baixariamos o salario de todos os concelleiras e concelleiros, así como reduciriamos os asesores. En total temos previsto aforrar un millón de euros ao ano neste concepto.

Conservalo. Nós temos claro que a construción do Museo do Automóbil non se pode facer a costa de cargarse algo que é de todos os coruñeses. Hai terreos de sobra na Coruña, mesmo de propiedade do seu promotor para facelo, sen necesidade de ocupar a maior zona verde do Concello.

Héctor non estaba entre os primeiros 99 asinantes do manifesto. Non sei se quería estar ou non. En canto a Stop Desahucios, fan un traballo magnífico nesta cidade, atendendo a situacións de urxencia social, e sempre nos terán do seu lado, porque compartimos os mesmos obxectivos: ter unha cidade libre de desafiuzamentos.

Aplicar a normativa municipal, e encargarlle a súa vixilancia aos servizos municipais, e non a unha empresa privada, como pasa actualmente.

Pois si. É un dos puntos esenciais do noso programa, bótelle un ollo. En breve: facer do transporte público a primeira opción de mobilidade da cidade; reordear as liñas de buses; facer tarifas asumíbeis para todos; favorecer a bici, a peonalización.

Este é un problema que sobrepasa as competencias municipais, pero temos claro que o Concello debe utilizar toda a súa capacidade de presión para solucionar este asunto, que a min como veciño da zona tamén me afecta. Por exemplo, utilizar a presenza do Concello na Autoridade Portuaria para algo máis que para compadrear: para defender os intereses dos coruñeses.

A Marea ten claro o compromiso contra o maltrato animal, e o Concello da Coruña non debería subvencionar nin activa nin pasivamente actividades deste tipo. Este compromiso está por riba de gañar ou perder uns votos. É unha cuestión ética e de principios, así como de prioridades no gasto do diñeiro público. Coas necesidades que hai na cidade, creo que subvencionar corridas de touros non debería ser unha prioridade para o Concello.

Nós reunímonos tanto cos cooperativistas como cos veciños de Elviña. Cremos que hai unha solución para coordinar os intereses de ambos. A construción do parque ofimático non pode levarse por diante San Vicente de Elviña, pero isto non supón cupabilizar de nada aos cooperativistas.

A Coruña debe recuperar a ilusión e a felicidade por falar galego. A Marea Atlántica promoverá o uso do galego no Concello e na cidade. Con alegría. Se todo vai ben, o próximo alcalde da Coruña será galego-falante e falarao con naturalidade.

Nós temos un plan para promocionar as bibliotecas municipais, e para integralas nunha rede coas que teñen outras titularidades. Haberá que mellorar a xestión (agora en moitos casos privatizadas) e respectar as zonas de silencio, separadas das de actividades. Pero tamén os centros cívicos poden ter espazos diferenciados para ser utilizados como aulas de estudo. Eu lembro que na miña época de estudante utilizaba o Centro Cívico da Sagrada Familia. Moitos exames teño preparado alí.

En Novo Mesoiro apostaremos por fomentar o transporte público, moi abandonado. E utilizaremos a presión do Concello para conseguir que por fin se faga o Colexio. Ademais, habería que ampliar o centro cívico, e utilizar os locais baleiros de propiedade municipal para actividades e darlle máis vida ao barrio.