Polo mesmo que o resto do concello está paralizado: falta de xestión, ineficacia na xestión de persoal, servizos sobredimensionados e outros sen persoal. Nós levamos moito tempo propoñendo unha modificación da relación dos postos de traballo do persoal do concello e é algo que pensamos facer en canto cheguemos ao goberno.

Desde o momento en que DO ten como única proposta para o concello facer un ERE e que se decoñece o que faría de chegar ao goberno porque nunca fixo propostas construtivas en catro anos, parece imposible chegar a un pacto cunha forza que ten, como o propio Jácome declarou, un programa oculto.

Neste momento, temos a praza de abastos da Ponte pendente de abrir. É aí onde queremos incorporar os produtos ecolóxicos, de produción local, con xestión pública. Empezaremos por aí e despois podemos pensar noutras infraestruturas que lle dean saída á produción agrícola ourensá, que compre potenciar.

O BNG-Asembleas Abertas ten un perfil moi definido e un proxecto moi claro para Ourense, somos nacionalistas e de esquerdas. As candidaturas chamadas "de unidade popular" non lle dan resposta a este proxecto que o BNG quere desenvolver e até última hora non se sabía como e por quen ían estar conformadas. Por iso o BNG decidiu presentarse en solitario, coas nosas siglas e as nosas liñas ideolóxicas ben definidas.

O maior acerto é a xestión que fixemos desde o goberno, en xeral. As actuacións nos barrios, o proxecto para a praza de abastos nº 1, a política de vivenda... Sabemos que cometemos algúns erros no goberno, pero asumímolos e aprendemos deles. Non destacaría ningún en especial.

Si, parece que ao candidato do PSOE lle esquece que, se hai plan de emprego en Ourense, é grazas ao BNG. Seguramente porque agora sabe que era algo moi necesario para a cidade pero que o PSOE votou en contra cando o BNG o levou ao pleno xa no ano 2013. Probablemente tamén se esquece de mencionar que desde que se lle remitiu á Xunta hai xa un ano e non houbo resposta, el tampouco fixo nada por obter os informes necesarios para poder poñelo en marcha. Seguramente ten asumido que será o BNG o que o poña en marcha a partir do 24 de maio

Cando o BNG chegou ao goberno a concellería de mocidade practicamente non existía, apenas tiña persoal e orzamento e aí está unha das críticas que lle fixemos sempre ao PSOE, que algunhas áreas do BNG non dispuñan de medios. Non obstante, aí está a Casa da Mocidad, unha aposta forte que o BNG fixo desde o goberno para a mocidade. O PSOE terá que dar contas de por que a mantivo pechada dous anos.

O BNG apoia e participa da plataforma a prol da Casa da Xuventude. É moi importante que a mocidade reivindique os seus espazos e os seus dereitos e nós estaremos aí para apoialos. Se facemos forza entre todas e todos a Xunta terá que recuar e devolverlle á Casa o uso que tiña e polo que destacaba como modelo de xestión dun lugar para a xuvntude.

Agora mesmo unicamente pensamos en desenvolver o traballo que queda por facer de aquí ata o 24 de maio. Falar coa xente, dar a coñecer o noso programa, e ofrecernos como a única alternativa clara de esquerdas e nacionalista. Despois do 24, e segundo quede configurada a corporación municipal, estudaremos os pasos que podemos dar.

O BNG sempre apostou pola cultura, unha cultura á que todos e todas teñamos acceso. É certo que priorizamos a cultura propia pero cremos que o acceso á cultura en xeral ten que formar parte dun proxecto de goberno municipal. Algúns apostan porque a cultura ten que se ofrecer a "prezos de mercado", nós cremos que ten que ser accesible para todos e todas.

Non sei se é a mellor preparada, en todo caso, si estamos preparadas para gobernar, para traballar e para facelo con coherencia e honestidade. Niso estou segura de que somos as mellores.

Presentamos un programa realista. Non incluímos nel nada que non pensemos facer. En todo caso podo falar do que faremos no momento en que cheguemos ao goberno: unha auditoría para estudar a posibilidade de recuperar as concesións para a xestión pública e mais para saber que cambios hai que facer na estrutura do concello. Abrir a casa da mocidade en condicións, non a medias e plantarnos no despacho de Feijoo para que, dunha vez por todas faga os informes pertinentes, favorables, para poder poñer en marcha o plan de emprego.

Claro, de feito o noso programa está deseñado de xeito que as decisións as tome a veciñanza. Queremos distribuír a cidade en distritos que teñan capacidade de decisión e tamén unha partida orzamentaria, non para que sexan un ente baleiro de contido.

Penso que hai quen quere facer dos plenos un circo para o seu propio interese e o peor é que isto impide que os plenos sirvan para o que son, para facer debate político e levar propostas en interese da cidadanía.

Non creo que sexa a mellor preparada en formación pero si podo asegurar que procuro ser coherente e honesta e por iso estou en política, porque quero o mellor para a cidade de Ourense, para Galiza, e facendo de observadora non se pode conseguir, hai que implicarse, dedicarlle tempo, poñer a cabeza e o corazón naquilo no que cres. Para iso estou, para facer o mellor para Ourense, como o fago na miña casa para a miña familia.

Estou orgullosa da miña organización que, desde o primeiro momento, afrontou con valentía estas eleccións, presentándose coas súas siglas e co seu ideario, se ocultar nada, se agardar salvadores, sen disfrazarse de proxectos novos e descoñecidos que aínda son unha incógnita.

Xa se está aplicando, pero creo que a Ourense non nos favorece moito. Creo que foi un erro querer entrar na categoría de grandes cidades. Ourense non o é, nin falta que lle fai.

Creo que o primeiro que se debe facer desde as institucións é dar exemplo e valorizar o propio, e a lingua e o noso maior sinal de identidade. Se desde o concello non o valoramos pouco lle podemos pedir á cidadanía. Se os informes dos técnicos do concello se emiten en castelán logo non lle podemos dicir á cidadanía que o concello é modelo de cumprimento da lei de uso do galego na administración pública. COmezaremos por mellorar o uso interno do galego no concello e, despois, actuaremos en distintos sectores da cidade para prestixiar a lingua.

Eu comprométome, se teño responsabilidades de goberno, que galego vai ser unha prioridade para o concello e esta prioridade vai ser transversal. Non serve de moito facer cousas para prestixiar o galego desde a concellaría de cultura se na de urbanismo non se emprega. Comezaremos por aí.

Ás veces acusan ao BNG de ser antisistema, de feito moitas veces mandas as forzas do orde aos nosos actos e ás manifestacións nas que participamos. Partido do sistema? Vivimos nesta sociedade pero aspiramos a cambiala, desde este punto de vista eu síntome antisistema e por iso estou en política, porque así non me vale.

Non, arrepentimento non é a palabra pero é certo que non é agradable ver como un compañeiro ou compañeira ten que abandonar o seu labor institucional por cuestións que non van chegar a ningún sitio. Pero temos un código ético e comezamos por nós mesmas a aplicalo, se non fose así non poderiamos esixirllelo aos demais. Hai que ser coherentes, nisto tamén.

O termalismo será un bluf se goberna quen pensa así. PAra o BNG-Asembleas Abertas o termalismo é un potencial que temos que explotar para conseguir que sirva para dinamizar economicamente a cidade, para crear postos de traballo, para atraer turismo e fomentar o comercio local. Por iso queremos dar o primeiro paso nese impulso definitivo expropiando o solar de Xardín das Burgas e construíndo aí un equipamento termal.

Non, Ourense precisa unha forza como o BNG-Asembleas Abertas no concello, e a cidadanía sábeo. É máis, se temos a posibilidade de liderar o goberno, como en Allariz ou Pontevedra, estamos seguras de que o seguinte goberno tamén será do BNG. Por que non darnos a oportunidade?

Cando o BNG chegou á concellería de Deportes quedaban 400 euros para gastar en todo o ano no consello municipal de deportes. As piscinas de Oira estaban pechadas e sen posiblidade económica de arranxalas. Chegouse a un acordo que consistiu en que a empresa restauraba as piscinas (non hai que esquecer que xa eran de pago antes) e construía un complexo deportivo no que investiu 10 millóns de euros. A cambio diso, o concello achega 300.000 euros e, cando remate a concesión, todo reverte para o concello, o complexo deportivo e a xestión da piscina. O acordo non é malo, o cal non significa que sexa o modelo que queremos seguir no futuro, simplemente foi unha decisión condicionada por unha situación concreta.

Como seguramente vostede saberá, o primeiro tramo da lista xa estaba feito cando se produciu esa imputación, polo que iso non tivo que ver. Pero si é certo que se non fose así, Xosé Somoza tería dimitido. Non como outros candidatos qeu, estando imputados, seguen aí.

O PXOM está pendente de resolver as alegacións, entre elas as que presentamos nós. O que está claro é que non podemos facaer un novo PXOM, como anunciou o candidato do PP, a cidade non se pode permitir ese gasto nin esa paralización por máis tempo. Exporemos o texto definitivo polos barrios para que todas as veciñas e veciños coñezan o que se vai aprobar (e non volva pasar o mesmo que co de 2003) e farase unha segunda exposición, que foi unha condición que nós puxemos para aprobalo inicialmente. Dependendo do texto que resulte, darémoslle a aprobación provisional ou non. O que temos claro é que non podemos volver a un PXOM especulativo como o que pretende o PP.

A oposición é imprescindible, o seu labor é facer control do que fai o goberno e, se ese goberno é receptivo, pódense facer moitas propostas para mellorar a xestión do goberno. No noso caso, o PSOE non ten sido moi receptivo pero algunhas cousas conseguimos, como a ordenanza de acceso á zona vella ou o billete de bus gratis para desempregados. A iniciativa de expropiación do solar de XArdín das Burgas e o Plan de Emprego tamén foron do BNG, están sen rematar pero temos confianza en poder desenvolvelas.

É moi difícil transmitir a mensaxe nacionalista nunha cidade na que o PP ten tecida unha rede clientelar tan grande, na que a Deputación é unha oficina de colocación e na que o concello tamén o foi en grande medida. O resultado de 2003 deuse nun momento concreto no que había condicións máis favorables para o BNG, pero nós estamos afeitas a nadar contra corrente e aí seguiremos a pesar dos resultados que teñamos.

O mellor que podería facer o BNG para que o Concello saia nos xornais polos seus logros de xestión sería que liderasemos o goberno. Non hai máis que ver o exemplo de Pontevedra, o alcalde do BNG non dá feito a recoller premios internacionais polo modelo de cidade que o BNG desenvolveu alí. En Ourense tamén é posible, depende de nós.

En fin, que queres que che diga, nese aspecto síntome a representante de todas as mulleres de Ourense e, como tal, actúo. Espero estar á altura do que as mulleres necesitan nunha necesidade como esta.

O BNG, cando estivo no goberno, tivo os barrios como prioridade, transformamos o da Inmaculada, o Couto, Mariñamansa... esperamos continuar ata Palmés ou CAstro de Beiro a partir do 24 de maio. Hai tanto por facer nos barrios rurais!

Agora mesmo, coa situación que estamos vivindo, a nosa prioridade é a creación de emprego, sobre todo de emprego para os mozos e as mozas, se seguimos perdendo 17 mozos diarios Ourense non ten futuro. Propoñemos un plan de choque para evitalo e, por suposto, poñer en marcha o plan de emprego que contaba cun financiamento de 3 millóns de euros pero que nós intentaremos elevar a 5 millóns.