Ola, boa tarde. É un pracer para o BNG estar aquí, neste encontro dixital de La Voz de Galicia. Esperamos dar resposta a todas as vosas preguntas. Imos entón!!

O BNG está a favor de incrementar a participación da cidadanía no goberno municipal da nosa cidade. De feito, o noso programa electoral foi elaborado conxuntamente coa cidadanía e os movementos sociais. Nas nosas propostas de actuación figuran un apartado de goberno aberto, en que o BNG aposta pola participación da cidadanía nos plenos e na elaboración dos orzamentos municipais, alén de cuestións esenciais como o uso e programación compartida dos espazos municipais (centros cívicos). Podedes aprecialo en www.sondebarrio.com. En todo caso, o BNG entende que a participación cidadá é algo máis que elección directa da alcaldía.

A nosa presenza nas deputacións provinciais non é incompatíbel coa nosa demanda da súa supresión. De feito, é algo que no que insistimos desde sempre, con ou sen responsabilidades de goberno nas mesmas. O BNG aposta por outro mapa local de administración galega, en que as comarcas e as áreas metropolitanas son os verdadeiros territorios de actuación. No caso concreto da Coruña, o BNG aposta pola integración do noso concello no Consorcio das Mariñas, como primeiro paso para a constitución da nosa área metropolitana, ao tempo que demandamos a supresión das deputacións. Así figura no noso programa, que tes a túa disposición en www.sondebarrio.com

Nunha etapa de crise económica como a actual, de recortes de dereitos laborais e sociais das políticas de dereitas do PP e do PSOE, a política social, xunto coa creación de emprego, é unha prioridade para o BNG. Apostamos por incrementar a partida de gasto social até un 7% dos orzamentos municipais para políticas de inclusión social (plan municipal de inclusión social e oficina municipal de inclusión social) para atender ás persoas que non teñen traballo nin protección social e para garantir o dereito á vivenda. Tamén insistimos na protección das persoas maiores, persoas con discapacidades, mulleres e mocidade, con apartados específicos de actuacións. E por último, tamén insistimos na necesidade de rematar cos asentamentos precarios na nosa cidade (penamoa, as rañas, o campanario e a pasaxe) para garantir unhas boas condicións de vida ás persoas que viven en tales asentamentos. En definitiva, no BNG apostamos polo benestar social como piar da política municipal do noso concello. Podes comprobalo no noso programa, que figura en www.sondebarrio.com

Garantirmos o cumprimento da legalidade en materia de uso e posta en valor do galego, o noso idioma, non se pode ver como imposición. Todo o contrario, como un medio tamén axeitado para garantirmos que o galego recupere o seu espazo natural na nosa cidade, que é tan galega como as demais.

A defensa da legalidade, tamén aquí, non pode implicar paso de facturas. O BNG sempre actúa de conformidade coa legalidade e, no caso concreto do noso topónimo, trátase de aplicar a lexislación e xurisprudencia que outros non queren cumprir.

O dereito a vivenda aparece recoñecido en distintas normas de rango moi diferente. Todas as institucións públicas deberían garantir o acceso á vivenda das persoas, especialmente das máis necesitadas, entre as que se atopa a xente moza e moitas persoas en risco de exclusión social. Polo tanto, Estado, Comunidades Autónomas e Concellos deberían actuar para garantir a materialización do dereito á vivenda.

O dereito a vivenda aparece recoñecido en distintas normas de rango moi diferente. Todas as institucións públicas deberían garantir o acceso á vivenda das persoas, especialmente das máis necesitadas, entre as que se atopa a xente moza e moitas persoas en risco de exclusión social. Polo tanto, Estado, Comunidades Autónomas e Concellos deberían actuar para garantir a materialización do dereito á vivenda.

É totalmente mellorábel e sempre garantindo o dereito da veciñanza ao descanso. No noso programa vai un apartado específico para a modificación da ordenanza municipal correspondente, tal e como puxemos de manifesto publicamente en máis dunha ocasión. Neste sentido tivemos en conta o que pasa nas principais cidades e vilas do Estado e de Galiza, que si contemplan a posibilidade de ter música ambiental nos bares e cafeterías. A proposta en cuestión podes consultala no noso programa (www.sondebarrio.com)

Tal e como ten sinalado a Real Academia Galega, Galiza e Galicia son duas formas válidas para chamar ao noso país. Duas formas galegas, polo que encaixa perfectamente no cumprimento da legalidade en materia de topónimos.

A solución aos problemas de tráfico da nosa cidade e da nosa comarca pasan por un plan de mobilidade, en que se fomente o transporte público nas súas distintas modalidades como alternativa ao uso do coche particular. No caso concreto do transporte urbano, cumpre revisar a concesión administrativa da Compañía de Tranvías, para garantir que todos os barrios estean comunicados entre si, cos polígonos industriais e cos outros puntos estratéxicos da nosa cidade. E no caso concreto do transporte metropolitano, o BNG aposta pola optimodalidade, isto é, apostamos polo uso das infraestruturas xa existentes, que no noso caso son tamén o transporte ferroviario de cercanías e o transporte marítimo, alén de fomentar o transporte público por estrada.

O BNG aposta pola Coruña como cidade galega, de barrios, metropolitana e sustentabel, para que o concello da Coruña sexa motor de desenvolvemento económico e social da nosa cidade, da nosa comarca e de Galiza. Isto é moi importante neste momento de crise económica e de padecemento das políticas de dereitas do PSOE e do PP, razón pola que o BNG aposta ademáis pola creación de emprego e a defensa dos servizos públicos. En definitiva o que nos pediu a cidadanía nas distintas reunións de traballo que tivemos para elaborar conxuntamente o noso programa.

Neste momento o prioritario é rematar coas obras da terceira rolda, sobre o que ten insistido moitisimo o BNG. E ademais, apostar por un transporte público alternativo, sinaladamente o transporte ferroviario de cercanías e o transporte marítimo. O ferroviario une a nosa cidade con Ferrol, pasando polos principais concellos da nosa comarca, polos nosos polígonos industriais e pola propia Universidade da Coruña, chegando ate o centro da cidade (Praza de Ourense).

Como un matrimonio, ou parella de feito, ben «avenido». O Dépor é, como outras entidades da nosa cidade, unha institución moi representativa da Coruña e de Galiza, polo que merece que o concello da Coruña lle preste unha atención integral.

As touradas non son servizo público nin cultura nin arte. Polo que non crean emprego nin riqueza, alén de ser unha tortura. O BNG, especialmente nesta época de crise, entende que as touradas non poden contar con axudas públicas. Nunha década xa se teñen gastados un millón de euros en touradas, mentres que colectivos específicos que traballan con persoas con necesidades moi específicas ou en risco de exclusión social non teñen axudas públicas para a realización das súas actividades.

Non so iso, que está moi ben. No noso programa, o BNG aposta pola participación da cidadanía nos plenos e pola participación nos orzamentos municipais, ademais de outras cuestións sempre en materia de participación. No noso programa tamén incluimos unha proposta específica sobre a necesidade de que os plenos municipais se retransmitan en directo a través de Internet.

O BNG aposta por un sistema aeroportuario galego, en que os tres aeroportos actuen baixo os principios de colaboración, cooperación e complementariedade. Nunca en réxime de competencia, porque isto só beneficia ao aeroporto portugués de Sa Carneiro. Ademais, no noso programa insistimos en que o noso aeroporto ten que estar conectado coas principais cidades e vilas do Estado e coas catro principais cidades aeroportuarias de Europa para estarmos conectados co mundo. Por certo, o BNG xa amosou a súa opinión contraria á privatización de AENA e á entrada de capital privado neste ente.

O BNG entende que o deseño da cidade da Coruña como xigantesco bazar, a través de grandes áreas comerciais como o Marineda City, supón un ataque ao pequeno e mediano comercio, destruindo emprego de calidade e iniciando un proceso de desertización da vida de barrio da nosa cidade. O BNG entende que as grandes áreas comerciais son incompatibeis co pequeno e mediano comercio e que a única aposta válida aquí e a do pequeno e mediano comercio. Por certo, parece que non é a mesma opinión no caso do Partido Popular e no caso do Partido Socialista, que, ademais de entender que son compatibeis, apostan por áreas comerciais no Parrote e na estación intermodal.

O programa do BNG, que se fixo conxuntamente cos movementos veciñais e sociais, ten un apartado específico de actuacións para os barrios, tanto rurais como urbanos. Neste apartado figura o barrio de Monte Alto, con actuacións moi variadas e diferentes, entre as que figuran a recuperación do vello cárcere da Coruña para usos da cidadanía. Se tes maior interese, podes ver o noso programa en www.sondebarrio.com.

No programa do BNG, fronte as grandes áreas comerciais, figuran aproximadamente quince concretas actuacións para apoiar ao pequeno e mediano comercio, que se poden reconducir en tres grandes ideas: 1. Participación do pequeno e mediano comercio no deseño e execución das políticas municipais que lles afecten, mediante a preceptiva consulta previa. 2. Promoción da venda no pequeno e mediano comercio, con actuacións tales como banco de locais comerciais, exencións e bonificacións de tributos locais e planos de dinamización do pequeno e mediano comercio atendendo a realidade de cada barrio. 3. Políticas de fomento do consumo no pequeno e mediano comercio como opción responsabel, con medidas moi específicas que pretenden incentivar e facer máis cómoda a compra no pequeno e mediano comercio.

A xestión do actual equipo de goberno da Universidade da Coruña é realmente modélica. En relación coas necesidades da Universidade da Coruña, o BNG entende que o concello da Coruña ten que volcarse nas necesidades que esta institución de educación superior ten e que neste momento pasan por unha residencia universitaria pública e por un parque tecnolóxico, garantindo en calqueira caso o dereito da veciñanza de San Vicenzo de Elviña a vivir no lugar con dignidade.